2025
Më 15 dhjetor, AAB në bashkëpunim me Qendrën Balance, organizoi një workshop online të dedikuar aksesit në financë për gratë sipërmarrëse, për të forcuar kapacitetet e tyre financiare.
Aktiviteti bëri bashkë rreth 25 gra sipërmarrëse, të cilat u njohën me praktika dhe instrumente financiare që kontribuojnë në rritjen dhe qëndrueshmërinë e biznesit. Gjatë workshop-it u zhvilluan sesione informuese mbi tema kyçe si SEPA, produkte bankare të përshtatura për bizneset, mundësitë e kreditimit për sipërmarrjet e drejtuara nga gratë, si dhe shitjet online dhe përdorimi i kanaleve digjitale.
Në panelin e diskutimit morën pjesë ekspertë të ProCredit Bank, znj. Blerta Selamaj, Coordinator Business Development Function, znj. Erinda Ropi, Deputy Head of Department, Business Support and Digital Channels Department, dhe znj. Fortesa Jakupi, Head of Business Support and Digital Channels Department, si dhe z. Spiro Brumbulli, Sekretar i Përgjithshëm i AAB-së.
Workshop-i u përmbyll me një sesion interaktiv pyetje – përgjigje, gjatë të cilit pjesëmarrëset ndanë sfidat e tyre të përditshme dhe diskutuan zgjidhje konkrete. Një vëmendje e veçantë iu kushtua pagesave të shpejta (instant payments), të cilat u prezantuan si një zgjidhje inovative dhe lehtësuese për bizneset dhe startup-et e drejtuara nga gratë, duke rritur efikasitetin dhe shpejtësinë e transaksioneve financiare.
Më 11 dhjetor, AAB, në bashkëpunim me kompaninë Blinking, organizoi në Tiranë një workshop profesional të dedikuar të ardhmes së tërheqjes së klientëve në distancë (digital onboarding), si dhe aspekteve kyçe që lidhen me përputhshmërinë rregullatore dhe parandalimin e pastrimit të parave (AML).
Ky aktivitet mblodhi përfaqësues të sektorit bankar nga strukturat e Kanaleve Alternative, Përputhshmërisë dhe AML, duke krijuar një platformë të vlefshme për shkëmbimin e eksperiencave, praktikave më të mira dhe diskutimin e sfidave aktuale me të cilat përballet industria bankare në proceset e digjitalizimit.
Gjatë workshop-it u prezantuan zgjidhje dhe qasje inovative që synojnë thjeshtimin dhe sigurinë e procesit të onboarding digjital. Një pjesë e rëndësishme e agjendës ishte demonstrimi i zgjidhjes digjitale, prezantuar nga z. Miloš Misojčić dhe z. Mladen Tušup, ku u ilustrua në mënyrë praktike se si teknologjia mund të kontribuojë në përmirësimin e performancës së biznesit, duke respektuar njëkohësisht kërkesat rregullatore.
Në përmbyllje u zhvillua një sesion interaktiv pyetje-përgjigje, ku pjesëmarrësit patën mundësi të adresojnë çështje teknike dhe operative, si dhe të diskutojnë mbi hapat e ardhshëm dhe mundësitë e bashkëpunimit.
AAB mori pjesë në tryezën e diskutimit “Sfidat e Financimit të Teknologjisë Bujqësore: Përshtatje Transformuese përballë Zhvillimeve Sociale dhe Sfidave të Klimës”, organizuar nga REC Shqipëri në bashkëpunim me aktorët kryesorë të sektorit financiar dhe atë të siguruesve.
Diskutimet u fokusuan në rolin e institucioneve financiare në mbështetjen e fermerëve përmes produkteve të përshtatura për investime në teknologji novatore, të cilat ndihmojnë në përshtatjen dhe zbutjen e efekteve të ndryshimeve klimatike, si dhe në rritjen e eficencës bujqësore. Palët theksuan rëndësinë e bashkëpunimit midis politikave shtetërore, produkteve financiare, dhe komuniteteve të fermerëve për të rritur ndikimin e fondeve të dedikuara për sektorin.
Gjatë tryezës, u theksua roli thelbësor i sektorit bankar në nxitjen e investimeve bujqësore përmes produkteve financiare më të specializuara dhe më të aksesueshme për fermerët. Bankat sollën në vëmendje sfidat që hasen në terren, rëndësinë e vlerësimit të riskut, nevojën për informacion më të mirë financiar dhe domosdoshmërinë e zhvillimit të instrumenteve të qëndrueshme financimi që mbështesin adoptimin e teknologjive të reja.
REC Shqipëri prezantoi gjithashtu gjetjet e nismës “Zgjidhjet Afrojnë Fermerët”, e cila gjatë dy viteve ka sjellë te grupet e fermerëve teknologji si sistemet vaditëse me energji diellore dhe makineritë grirëse të biomasës, duke treguar mundësitë që krijohen kur financimi kombinohet me inovacionin.
Në takim u nënvizua edhe domosdoshmëria për edukim financiar më të thelluar për fermerët, si edhe për skema sigurimi më efektive për prodhimin dhe asetet bujqësore, me qëllim rritjen e qëndrueshmërisë së investimeve dhe uljen e riskut për sektorin bankar.
Tiranë, 26 shkurt 2025 – McKinsey & Company, në bashkëpunim me Shoqatën Shqiptare të Bankave (AAB), organizuan Tryezën e Rrumbullakët mbi Bankingun, një veprimtari që mblodhi së bashku drejtues të lartë të sektorit bankar për të diskutuar mbi zhvillimet dhe sfidat kryesore të industrisë.
Në fokus të diskutimeve ishin gjetjet e “Global Banking Annual Report 2024”, i cili ofroi informacion rrerh tendencave globale, prioriteteve strategjike dhe praktikave më të mira nga institucionet financiare lider në industri. Një nga çështjet kryesore që u trajtua ishte diferenca në rritje midis bankave në adoptimin e bankingut mobile dhe ndikimi i tij në rritjen e biznesit, efikasitetin operativ dhe përvojën e klientit. Gjithashtu, u diskutuan edhe ndryshimet në sektorin financiar që po ndikojnë në të ardhmen e bankingut në Shqipëri.
Takimi krijoi një hapësirë për një dialog të hapur mbi sfidat dhe mundësitë e industrisë, duke nxitur reflektimin mbi rrugët që bankat mund të ndjekin për t’u përshtatur dhe për të përparuar në një mjedis financiar gjithnjë e më dinamik.
